عام السعادة 2017 Happiness Year

بسم الله الرحمن الرحيم

كروشيه~ فيونكة بغرزة قشور السمك ♥

بسم الله الرحمن الرحيم

طبخ~ كوكيز♥

خياطة ~ حامل أقلام وفاصل كتاب مزدوج

السلام عليكم ورحمه الله وبركاته

انيوهاسيو يوروبون 

كيفكم ياجميلات ان شاء الله تكونوا بخير

تدوينة اليوم فكرة جميلة شفتها في البنتريست اللي هي حامل اقلام ويكون فاصل كتاب فنفس الوقت

بما اني مرات اعاني لما ابغى اطلع السطح اقرأ كتاب خصوصا الفترة الماضية مع الاجواء الجميلة

اشيل الكتاب وقلم جوالي وكوب القهوة يدي ماتكفي والاغراض تصير تطيح 

فمررة حبيت الفكرة وحبيت اطبقها وقلت اصورها للمدونة 

الاشياء اللي نحتاجها:

أقمشة حسب ذوقكم

فازلين مقوى لو كان قماشكم خفيف

مطاط اسود عرضه تقريبا 3/4 سم او حسب ماتبغوا

وبسم الله نبدأ

أول شي اخترت كتاب يكون طوله متوسط وغالبا احجام الكتب حاليا كذا

قست طول الكتاب 8.5 انش

*المقاسات ممكن تختلف من شخص لاخر حسب احتياجه والحجم اللي يفضله

فضلت اني ارسمها على ورق عشان يسهل القص وما احوس وانا ارسم على القماش وممكن تطلع غلط الزوايا

الطول 8.5 انش والعرض 2.5 انش زوائد الخياطة من كل جهه 1.5 انش

اخترت قماشين وحطيتهم فوق بعض لاني احتاج قطعتين نفس المقاس

وحطيت الباترون اللي رسمته فوقه وثبته بالدبابيس عشان مايتحرك وقت القص

القطعة الصغيرة اللي هي الجيب كمان رسمتها بطول 4.5 انش ونفس العرض للقطعة الاولى 2.5 انش ومن وزوائد الخياطة 1.5 انش

بعد ماقصيتها رسمت حدود الخياطة 

الجيب لفيت طرفهه العلوي وكويته عشان وقت الخياطة مايتعبني

نكوي الفازلين على واحد من الاوجه انا اخترت اللي حيكون تحت

*نتأكد قبل مانكوي الفازلين ان الوجه اللي يلمع يكون على القماش لانه اللزق فيه مع حرارة المكواة تذوب وتلصق في القماش

كذا يكون شكلها بعد الكوي

وكذا تكون القطع الثلاثة جاهزة 

*الجيب صورته هنا قبل ما اخيط طرفه

دحين نرتب القطع أول قطعة نحطها هي الوجه ونحط فوقهاا القطعة الصغيرة اللي حتكون الجيب

نسيت اصورلكم خطوة ثبت مطاط بالعرض عشان تثبت الاقلام

قصيت مطاطين بطول 8.5 انش ونثبتهم بالدبابيس

*اهم شي تنتبهوا الدبابيس كيف تثبتوها عشان وقت الخياطة خصوصا بالماكينة ماتكسر لكم الابرة

نحط القطعة الاخيرة ونثبتها بالدبابيس كويس مضبوط وممكن تحتاسوا شويا بسبب المطاط

خطيت اطرافه وخليت فتحه عشان اقدر اقلبه

قبل ما نقلبه نقص الزوايا بدا الشكل وممكن لو حسيتوا ان الاطراف زايدة قصوا منها

هنا انا قلبتها وكويتها عشان تترتب القطعة وخيط الفتحة 

ماحبيت شكل الخياط وممكن تخيطيها بيدك بغرزة اللفقة

وكذا يكون شكلها النهائي

حبيت اسويها مطاطين ممكن يكون الاول فاصل كتاب والثاني يلم باقي صفحاته

أرجو ان الشرح والموضوع نال إعجابكم

وشكرا لتواجدكم

دمتم بحب ❤

أول درس كروشية~ قاعدة للأكواب

بسم الله

السلام عليكم 

انيوهاسيو يوروبون "ارحب فيكم بالكوري" 

كيفكم يارب تكونوا دايم بخير وسعادة

المهم انا اخترت اني اشرح قاعدة للاكواب لاني سويته كذا مرة وانه يكون شي سهل كأول درس اشرحه

*ملاحظات صغيرة:

 انا ما حشرح الغرز حشرح فقط باترون القطعة

اللي حابه تتعلم الكروشية والغرز تقولي اسوي تدوينة شرح للغرز مو انا حشرحها حجمع لكم فيديوز وشروحات لها

ونبدأ

السطر الأول: نسوي دائرة سحرية نرتفع 4 سلاسل وبعدها داخل الدائرة نشتغل عامود وبعدها سلسلة وحدة، عامود ، سلسلة... ونشتغل لما يتكون عندنا 12عامود مع الارتفاع نسحب الخيط الزايد لما تتقفل الدائرة تمام ونقفل السطر بمنزلقة في ثالث سلسلة من الارتفاع.

السطر الثاني: نرتفع 3 سلاسل ونسوي عامود في الفراغ اللي بين العامودين من السطر السابق (شغلنا حيكون في الفراغات ونترك الاعمدة)، بعده سلسلة، 2 عامود، سلسلة، 2 عامود، ونشتغل كذا لنهاية السطر ونقفل بمنزلقة في ثالث سلسلة من الارتفاع.

السطر الثالث: نسوي منزلة في اول غرزة من السطر السابق بعدها نرتفع 3 سلاسل ونسوي 2 عامود، سلسلة، 3 عامود، سلسلة، 3 عامود، ونشتغل لنهاية السطر ونقفل بمنزلقة في ثالث سلسلة من الارتقاع.

السطر الرابع: نسوي منزلقة في اول غرزتين من السطر السابق ونفس الشيء نرتفع 3سلاسل نسوي 3عامود، سلسلة، 4 عامود، سلسلة، 4 عامود ونشتغل لنهاية السطر ونقفل بمنزلقة في ثالث غرزة من الارتفاع.

السطر الخامس: نسوي منزلقة في اول غرزتين من السطر السابق نشتغل 5 سلاسل، نترك غرزتين من السطر السابق ونسوي منزلقة، 5 سلاسل، منزلقة بعد غرزتين ونشتغل لنهاية السطر (بين كل غرزتين منزلقة عشان تتشكل عندنا السلاسل زي الاقواس) .



اخر قوس نسوي في سلسلتين فقط ونقفل السطر بعامود زي ماهو موضح في الصورة.



السطر السادس: في داخل اول قوس نشتغل 8 اعمدة نسوي منزلقة في القوس الثاني ونرجع نسوي 8 اعمدة في القوس الثالث وكذا لنهاية السطر (نشتغل اعمدة في قوس وقوس سكون منزلقة).



نقفل بمنزلقة في راس العامود الموجودة في اخر قوس زي ماهو موضح في الصورة يارب فهمتو علي.



نسوي سلسلة ونقص الخيط ونسحبه لبرا.



اخر خطوة تنظيف الخيوط نستخدم ابرة الكروشية عشان نخفي الخيوط الزايدة بين خيوط القطعة.



الكوي تمرري المكوتة على القطعة بشكل خفيف وسريعوبدون ضغط عليها.
مو شرط تسويها لكن تترتب القطعة وتصير شكلها افضل وتفرق خصوصا في المفارش والبطانيات.
*انا استخدمت مكواة بخار وماجربت العادية.



ودا شكلها بعد الكوي وبكذا نكون انتهينا






إن شاء الله تكونوا فهمتوا واستمتعتوا ❤

أعذروني انا وحدة مااعرف اشرح وحاولت قدر الامكان اشرح بوضوح وترتيب
*الجميلات اللي يفهمو في الكروشية اعطوني ملاحظاتكم عشان استفيد واطور نفسي اكثر


جدا ممتنة لكل شخصة قرأت الموضوع ❤❤

جُعْبَتِي تُفَكْر ،،

بسم الله الرحمن الرحيم

تدوينة استفتاحية حقيقية بإذن الله 

ليش قلت حقيقية؟! لأني بداية السنة الماضية لا لحظة قبل سنتين كانت ببداية 1435 كتبت موضوع وعلى اساس ابدأ بالتدوين وكذا مادري اذ احد دري فيها لكن نسيت سالفة المدونة بعدها والتدوينة لما رجعت قرأتها حسيتها تفشل فحذفتها

المدونة مالها توجه معين يعني المواضيع ماحتكون مثلا كروشية فقط حتكون بإذن الله منوعة كروشية، خياطة، طبخ، قراءة، اعمال يدوية بتاع كلو يعني

ان شاء الله استمتع بالتدوين وتستمتعوا وتستفيدوا معايا ❤❤

يوم الإثنين

بتاريخ 13/5/1437هـ

❤