طبخ~ كوكيز♥

السلام عليكم ورحمه الله وبركاته

اهلًا اهلًا بالجميلات ♥♥

تدوينة اليوم الشيء اللذيذ اللي هو "كوكيز"

الوصفة دي اخذتها من وحدة في السناب كانت ماخذته من النت اعتقد

وعلى مدحها تحمست اجربه وفعلا طلعت لذيذة وكل من ذاقها عجبته ما شاء الله

اعتمدتها عندي وما اعتقد حجرب طريقة ثانية غيرها

وبسم الله نبدأ

المقادير:

1 قالب زبدة حجم 100 جرام طرية بدرجة حرارة الغرفة

نص كوب سكر بني غامق

ربع كوب سكر ابيض ناعم الحبيبات

1 بيضة كبيرة الحجم

1 م ص فانيلا سائلة

كوب وربع دقيق متعدد الاستعمالات

نص م ص بيكج صودا

نص م ص ملح

كوب قطع شوكلاتة هيرشي شبه محلاة

الطريقة:

نخلط الزبدة مع نوعين السكر من 3-4 دقائق

في وعاء خارجي نخفق البيض مع الفانيلا ونضيفها لخلطة الزبدة والسكرونخليها تخلط كمان من3-4 دقائق لما تحسي ان قوامها صار اشبه بالكريمة

دحين نشغل الفرن عشان يحمى انا استخدم فرن كهربا الصغير فدرجة الحرارة تكون 250ْ من تحت فقط ومروحة الفرن شغالة  

يختلف فرن الكهربا عن العادي فالفرن العادي ممكن تخليه على 160 درجة

وبعدها نضيف الدقيق والبيكج صودا والملح للخليط ونخليه يخلط لما يتجانس

بعدها نضيف الهيرشي ونخلطها شويتين

قوام العجينة ماحيكون متماسك مرة يعني ماحتقدري مثلا تكوريها بيدك او تفرديها

في الصينية نحط ورق الخبز ونستخدم ملاعق او مغرفة الايسكريم 

حطيها بالحجم اللي يناسبك لما تدخل الفرن حتتفرش وتكبر 

ندخلها الفرن ونخليها تقريبا 10 دقائق نطلعها ونخليها تبرد 

وبالعافية .. ♥

سويت قهوة مخصوص عشان اصورها مع الكوكيز لكن رحت جلست مع امي وقعدنا نتقهوة ونسيت التصوير وافتكرت لما ماباقي الا شوي في الدلة وطلعت بنص الفنجان

*استفتاء ايش تفضلوا تكون الوصفات كذا مجرد مقادير وطريقة ولا أفضل شرح للخطوات بالصور؟

جربوها وقولولي رايكم

دمتم بحب ❤